იორდანია

იორდანია – რეგალიას მოგზაურობა

დღე 1

• 

• 

• 

• 

იორდანიაში ჩამოსვლა სულ რაღაც 280 ლარი დაგვიჯდა. ქუთაისიდან კვიპროსში (და უკან) 140 ლარად გავფრინდით. ხოლო კვიპროსიდან იორდანიამდე და უკან 38 ევროდ ვიყიდეთ ბილეთები.

იორდანიაში შესვლისთვის საქართველოს მოქალაქეებს ვიზა სჭირდებათ, მაგრამ თუ Jordan Pass გექნებათ შეძენილი, ვიზა აღარ დაგჭირდებათ და უპრობლემოდ გადაკვეთთ საზღვარს.

Jordan Pass-ის ღირებულება 100$-ია. ის ასრულებს ვიზის ფუნქციასაც და სხვადასხვა ტურისტულ ადგილებში უფასოდ შესვლისთვისაც გამოგადგებათ. პეტრაშიც კი შეხვალთ, სადაც შესვლა Jordan Pass-ის გარეშე 60$ ჯდება. იგივე ჯდება ცალკე ვიზის შეძენა, ამიტომ ფასის შეძენა ნამდვილად ღირს.

ავიყვანეთ წინასწარ დაჯავშნილი მანქანა და წავედით პეტრასკენ. ავტომობილით მოგზაურობა იორდანიაში ძალიან ბევრ დროს და ენერგიას დაგაზოგვინებთ, გზები კარგია და თითქმის სულ ცარიელი.

• 

• 

• 

პირველი დღის გეგმა ასეთი იყო: ამანიდან პეტრას მახლობლად, დასახლება ვადი მუსაში უნდა ჩავსულიყავით. გზად უნდა გვენახა მკვდარი ზღვა და ვადი მუჯიბის კანიონები.

პირველად ვადი მუჯიბის მივადექით. შესვლა 30$მდე ღირს, მაგრამ სანახაობა ისეთი შთამბეჭდავია, არ ინანებთ. სადღაც 2-3 საათი ჭირდება ყველაფრის ნახვას და კანიონის ბოლო ჩანჩქერამდე მისვლას. თან სულ წყალში გიწევს სიარული, მაშველ ჟილეტებს გაძლევენ და ასე მიუყვები საოცარ კანიონს.

კანიონების შემდეგ ვადი მუსასკენ გავემართეთ, სადაც ბინა გვქონდა ნაქირავები 23 დოლარად. აქ  ერთი ღამით ვაპირებდით გაჩერებას, რადგან იორდანიის მთავარი სანახაობა – პეტრა იქვე მდებარეობს და მეორე დღე მთლიანად მისთვის უნდა დაგვეთმო.

• 

• 

• 

დღე 2

როგორც აღვნიშნე, თუკი პეტრა უნდა ნახოთ, მინიმუმ ერთი ღამით მოგიწევთ ვადი მუსაში დარჩენა.

Jordan Pass-ის გამო პეტრაში უფასოდ შევედით, ისე დაახლოებით 60$ მდე დაგვიჯდებოდა. 10 წლამდე ბავშვებისთვის კი შესვლა უფასოა.

პეტრაში ძალიან ბევრი სანახაობაა და თავიდან ბოლომდე გასვლა არც ისე მარტივი საქმეა – დაახლოებით 14-15 კმ ის გავლა მოგიწევთ წინ და უკან, თუ ბოლომდე გადაწყვეტთ დათვალიერებას. თან გარკვეულ მონაკვეთებში აღმართები და კიბეებია, რაც კიდე უფრო რთულს ხდის მარშრუტს.

თუ დაიღლებით, შეგიძლიათ ვირი იქირაოთ – ათასჯერ მაინც შემოგთავაზებენ გზად. მთავარი სანახაობა “Treasury”-ა, რომელიც ალბათ ყველას გინახავთ ფოტოებზე და პეტრას შესასვლელიდან საკმაოდ ახლოსაა. მიუხედავად იმისა, რომ პეტრას ძებნისას ყველა ფოტოში მხოლოდ ამ ძეგლს ხედავთ, არსებობს პეტრას სხვა ღირშესანიშნაობაც, რომელიც პეტრას ყველაზე ბოლო წერტილშია და “Treasury”-ს არაფრით ჩამოუვარდება. ტურისტების გარკვეული რაოდენობა იქამდე არც კი მიდის. ესაა კლდეში გამოკვეთილი მონასტერი, რომელიც ფილმ ტრანსფორმერებშიც არის გადაღებული.

პეტრა დილის 6 საათზე იღება და საღამოს 6-ზე იკეტება. ჩვენც ამ დროს დავამთავრეთ ხეტიალი, ჯამში 15 კმ გავიარეთ და ყველაფერი ვნახეთ, რის ნახვაც შეიძლებოდა. ყველაზე მეტად ხალხის სიმრავლე არ მომეწონა – კომპლექსს იმდენი მნახველი ჰყავს, რომ მისტიკურობის შეგრძნება გეკარგება, თუმცა სანახაობა მაინც საოცარია და ნამდვილად არ დარჩებით უკმაყოფილო.

რაც შეეხება პრაქტიკულ რჩევებს:

1. წყალი – წყალი გზაში ბევრგან შეგხვდებათ, მაგრამ ერთი ბოთლი თავიდანვე გქონდეთ ჩანთაში;
2. საჭმელი – ჩვენ სასუსნავები გვქონდა წაღებული ჩანთით და გზაში შევექცეოდით. თუმცა, უკანა გზაზე, დაახლოებით შუა წერტილში არის ერთი რესტორანი, საკმაოდ გემრიელი კერძებით. მაგრამ იორდანიის სტანდარტებით არც ისე იაფია, 20$ მაინც დაგჭირდებათ კაცზე.
3. საპირფარეშო – გზადაგზა შეგხვდებათ;
4. სუვენირები – უამრავი შეგხვდებათ. 1-2 დოლარადაც არის რაღაცები, შევაჭრებაც მოსულა. თან, როგორც შევატყვე, მაინცდამაინც კარგად არ ეყიდებათ.

სხვათა შორის, პეტრას ნახვა ღამითაც შეგიძლიათ ყოველ ორშაბათს, ოთხშაბათს და ხუთშაბათს. 20:30-ზე უნდა იყოთ პეტრას შესასვლელთან, საიდანაც იწყება და 22:30-ზე მთავრდება ტური. ღამის ტურის ფასია 17 JD, ანუ დაახლოებით 25$. 10 წლამდე ბავშვებისთვის ეს ტურიც უფასოა. Jordan Pass-ით პეტრაში ღამით ვერ შეხვალთ.

• 

დღე 3

მეორე ღამე აქაბაში გავატარეთ, სასტუმროში. დილას კარგად ვისაუზმეთ და გამოვედით ქალაქში. რა თქმა უნდა, პირდაპირ წითელი ზღვის სანაპიროს მივაშურეთ.

სანაპიროზე ნავები ეყენა და ზღვაში გასეირნებას 25 დინარად გვთავაზობდნენ. ბოლოს 15-ზე დაგვთანხმდნენ და წითელ ზღვაშიც შევცურეთ.

წითელი ზღვა ოთხ ქვეყანას ესაზღვრება – იორდანიას, ისრაელს, საუდის არაბეთს და ეგვიპტეს. ძალიან შთამბეჭდავია, როცა ნაპირს მოშორდები, ზღვაში შედიხარ და ერთდროულად ეგვიპტეს, ისრაელის ქალაქ ეილატს და იორდანიულ აქაბას ხედავ. ზღვა კამკამაა და აქაბა იდეალური ადგილია ყვინთვისთვის (დაივინგი), რის გამოც ქალაქს ძალიან ბევრი ტურისტი ჰყავს.

აქაბადან პირდაპირ ვადი რამის უდაბნოსკენ ავიღეთ გეზი. Jordan Pass აქაც მუშაობს და უფასოდ შევედით. უდაბნოში უამრავი ბანაკია, რომელთა დაჯავშნაც booking.com-ზე შეგიძლიათ. ფასები განსხვავებულია – $10-იანი კემპიც შეგიძლიათ იქირავოთ და $300-იანიც.

ჩვენც მივედით ჩვენს ბანაკში. არ არსებობს ტურისტი, რომელიც ვადი რამშია ნამყოფი და  ჯიპ ტურით არ უსარგებლია. ჩვენც დავჯავშნეთ 2-საათიანი ტური, რაც დაახლოებით 55$-მდე დაგვიჯდა (ადამიანების რაოდენობას მნიშვნელობა არ აქვს). სასწაულ ადგილებს ნახავთ და ბოლოს უდაბნოში მზის ჩასვლასაც უყურებთ.

საოცარი შეგრძნებაა, როცა ვადი რამის ლანდშაფტს ხედავ – ძალიან ჰგავს მარსის რელიეფს. მოკლედ, თუ აქ მოხვდებით, არამიწიერი სანახაობის მომსწრეები გახდებით. ვადი რამის უდაბნოში უამრავი ცნობილი ფილმია გადაღებული: მარსელი, ვარსკვლავური ომები, ალადინი და სხვა.

სხვათა შორის, დღისგან განსხვავებით, საღამოს საათებში უდაბნოში საკმაოდ ცივა. პირადად ჩემთვის, ერთადერთი უსიამოვნო მომენტი ისევ და ისევ ხალხის სიმრავლე იყო – ტურისტებით სავსე უამრავი ჯიპი მოძრაობს უდაბნოში, რაც თავისთავად ცხადია უკარგავს ხიბლს იქაურობას, თუმცა ვადი რამის მონახულებაზე ამის გამო ნუ იტყვით უარს.