სანამ ბანგკოკზე გეტყვით რამეს, ვიზის ამბებით დავიწყებ – ყველაფერი ძალიან მარტივადაა.

ვიზას საზღვარზე, აეროპორტში იღებთ. იქვე ავსებთ ორ მარტივ ფორმას, რომელსაც არიგებენ ან თქვენ თვითონვე აიღებთ (ყველგან შეგხვდებათ, მიხვდებით. ან წინასწარ შეგიძლიათ შეავსოთ ონლაინ). ჩვენ 12 ვიყავით, ამიტომ ერთი საათი რიგში დგომა მოგვიწია.

აუცილებლად იქონიეთ თან ერთი ფოტოსურათი 6X4-ზე.
გაითვალისწინეთ, რომ ვიზა 1 აპრილამდეა უფასო.

სანამ ტურს დავგეგმავდი ბანგკოკზე მეუბნებოდნენ, რომ ორი დღე საკმარისია ამ ქალაქის დასათვალიერებლად, თუმცა ასე არ არის. საკმაოდ ბევრია სანახავი და ორ დღეში შეუძლებელია მოასწრო. ჩვენ სამი დღე ვიყავით და ბევრი ადგილის ნახვა ვერ მოვასწარით.

აუცილებლად უნდა ნახოთ მცურავი ბაზარი, სადაც ნავით გაისეირნებთ და ძალიან საინტერესო სანახაობის მომსწრეები გახდებით.

ბანგკოკში ბევრი მცურავი ბაზარია. ჩვენ ყველაზე ცნობილ Saduak floating market-ს ვეწვიეთ და ძალიან მოგვეწონა – ბაზარი ბანგკოკიდან დაახლოებით 1.5 საათის სავალ გზაზეა. იქვეა საკმაოდ პოპულარული ბაზარი – Railway Market, რომელიც მატარებლის ლიანდაგზეა განლაგებული. უამრავი ტურისტი ჩამოდის მატარებლის სანახავად, რომელიც შუა ბაზარში გადის – მართლაც საინტერესო სანახავია. მატარებელი კონკრეტულ საათებში მოძრაობს, ამიტომ დიდი ხნით რომ არ მოგიწიოთ ლოდინი, ბრმად არ წახვიდეთ. თუ ტურს აიღებთ, ბევრად მარტივია, ორივე ბაზარს ერთ დღეს ნახავთ უპრობლემოდ.

ბანგკოკში ყველაზე ცნობილი ადგილებია: The Grand Palace, Temple Of The Emerald Buddha, Wat Arun.

აუცილებლად გაისეირნეთ მთელს ბანგკოკში ყველაზე ცოცხალ ქუჩაზე, khaosan Road-ზე, სადაც ქუჩს დახლებზე გამოფენილი საჭმლის დაგემოვნებას შეძლებთ. აქ შეგიძლიათ მიირთვათ მორიელი, ნიანგი, მატლი, ხოჭო და ათასი უბედურება. ჯგუფის ყველა ბიჭმა ვჭამეთ მორიელი. რამდენიმე გოგომაც გარისკა და ხრაშუნა მატლებს გაუსინჯა გემო – არც ისეთი საზიზღრობა ყოფილა, როგორიც გვეგონა.