ფიფის კუნძულები ის ადგილია ტაილანდში, რომელიც გულგრილს ვერცერთ მოგზაურს ტოვებს. შესაბამისად ჩვენმა ჯგუფმაც ბანგკოკიდან პირდაპირ ფიფისკენ ავიღეთ გეზი.

ბანგკოკიდან ფხუკეთში ან კრაბიზე შეგიძლიათ ჩაფრინდეთ. დღის განმავლობაში ძალიან ბევრი ფრენაა, შემდეგ კი გემით შეძლებთ ფიფიზე გადასვლას.

ძირითად შემთხვევებში, დასმვენებლები ფხუკეთში რჩებიან და ფიფის სანახავად ერთ დღიან ტურს იღებენ. ჩემი რჩევა იქნება ასე არ მოიქცეთ და ფიფიზე სულ მცირე ორი ღამე მაინც გაატაროთ.

ჩვენც ორი ღამით დავრჩით ამ საოცარ კუნძულზე, სადაც არანაირი ტრანსპორტი არ არსებობს. ვერ ნახავთ ვერც მანქანებს, ვერც მოპედებს, ყველა მხოლოდ ფეხით გადაადგილდება. საოცარი ატმოსფერო სუფევს.

პირველ დღეს ტური ავიღეთ და იქვე ფიფის გარშემო რაც სანახავია, ყველაფერი ვნახეთ: Monkey beach, Bamboo Island, ლაგუნები, ულამაზესი ფერადი თევზები.

ფიფიზე უამრავი მოგზაურია, ძირითადად ახალგაზრდები და ისინი აქ მხოლოდ ექსკურსიებისთვის არ ჩამოდიან. ფიფის ღამის ცხოვრება თავის ცეცხლის შოუებით, ფულ ფართებით და გიჟური გართობით საკმაოდ ცნობილია მსოფლიოში.

ღამით, სანაპიროზე, ბარებსა თუ კლუბებში ეწყობა სხვადასხვა გასართობი სანახაობები, სადაც უამრავი ადამიანი იყრის თავს – ცეკვავენ, სვამენ და ერთობიან.

რაც შეეხება ფასებს, ვერ ვიტყვი რომ ძალიან ძვირი კუნძულია. მაგალითად, 6-8 დოლარად შეძლებთ ივახშმოთ რესტორანში, 50-80 ცენტად იყიდით ერთ ბოთლ წყალ, ალკოჰოლური სასმელიც არ არის ძვირი. 50 დოლარად აიღებთ 2 კაციან ნომერს ნორმალურ სასტუმროში, თავისი საუზმით.

ზღვის პროდუქტების მოყვარულებს გაგიმართლათ, სასადილოები და რესტორნები უამრავ კერძს გთავაზობენ ზღვის პროდუქტებით, რომელთა დაგემოვნებაც ნამდვილად მოგინდებათ.

ფიფიზე ყოფნისას აუცილებლად უნდა ახვიდეთ view point-ზე, საიდანაც ულამაზესი ხედი იშლება. ასასვლელად სადღაც ნახევარი საათი დაგჭირდებათ, ცოტა დამღლელია, თუმცა ნამდვილად ღირს.

ჩვენ შუადღით ავედით, მაგრამ ვფიქრობ მზის ამოსვლის ან ჩასვლის დროს ბევრად ლამაზი სანახავი იქნებოდა.