ჩინეთი

ჩინეთი – რეგალიას მოგზაურობა

ბოლო 4 წელია წელიწადში მინიმუმ სამჯერ მაინც მიწევს ჩინეთს ვესტუმრო, უმეტესად საქმის გამო, თუმცა მოგზაურობა ძალიან მიყვარს და რამდენიმე დღეს ყოველთვის ვიტოვებ სამოგზაუროდ.

ახლაც სწორედ ასე მოვიქეცი და გადავწყვიტე ამ პატარა ვოიაჟის შესახებ თქვენც მოგიყვეთ.

ხანჭოუში ყატარის ავიახაზებით ჩავფრინდი. ბილეთის ფასი 1500-2000 ლარის ფარგლებშია ყატარის შემთხვევაში.

სამხრეთ ჩინეთის ავიახაზებსაც დაახლოებით იგივე ფასები აქვს, თუმცა ყოფილა შემთხვევა 1200 ლარადაც მიყიდია ორი გზა.

ჩემი დაკვირვებით, ყველაზე იაფი პეკინის ავიაბილეთები აქვს ხოლმე ყატარს ჩინეთის ქალაქებს შორის, რადგან ეს უკანასკნელი 350 დოლარად მაქვს ნაყიდი ფასდაკლებების დროს.

საქმეში ჩინელები მაგრები, მშრომელები არიან.

ყველას უყვარს თავისი საქმე. მეეზოვე, ტაქსის მძღოლი, გამყიდველი – აბსოლუტურად ყველა გულიანად მუშაობს და თავის საქმეს ხუთიანზე აკეთებს, ქვეყანაც უსწრაფესად ვითარდება. არ არსებობს ჩავიდე და ახალი შენობა არ დამხვდეს აშენებული, ან ხიდი გეკეთებული.

სულ რაღაცას აკეთებენ, სულ რაღაც იცვლება და ვითარდება.

პირველი ათი დღე ერთ ქალაქში გავატარე. შემდეგ შანხაიში წავედი, მატარებლით.

მატარებელი თვითმფრინავის შემდეგ უსწრაფესი ტრანსპორტია ჩინეთში – 305 კმ/ს სიჩქარით. წარმოიდგინეთ თბილისიდან ბათუმში საათსა და 20 წუთში რომ ჩავდიოდეთ.

მატარებელი ძალიან კომფორტულია და ძვირიც არ არის, 500 კილომეტრიან მონაკვეთზე 15$ დამიჯდა ბილეთი.

ყველაზე კარგი ის არის, რომ დიდ ქალაქებში თითქმის ყოველ ნახევარ საათში ერთხელ დადიან.

შანხაი საოცარი მეგაპოლისია და ჩემი საყვარელი ქალაქია ჩინეთში. აქ ძალიან ბევრ საინტერეს რამეს ნახავთ და 2-3 დღე ნამდვილად დასათვალიერებლად.

ეს არის განვითარებული, მოძრავი და მჩქეფარე ქალაქი.

აუცილებლად სანახავი ადგილებიდან გირჩევდით:
1. ბანდი (Bund), საიდანაც ულამაზესი ხედი იშლება შანხაის ყველაზე დიდ ცათამბჯენებიან ნაწილზე;
2. Pearl Oriental Tower -350 მეტრიანი კოშკი, საიდანაც ქალაქიდან 360 გრადუსიანი ხედებით დატკბებით, გაივლით შუშის იატაკზე ისე, რომ ქვევით ყველაფერს ხედავდეთ;
3. იუ გარდენი (Yu Garden) – ულამაზესი ადგილი, სადაც ტექნოლოგიური ქალაქიდან უცებ ძველი სტილის ქალაქში ინაცვლებ. განსაკუთრებით ღამით არის ლამაზი;
4. აუცილებლად ეწვიეთ ერთ რომელიმე rooftop ბარს ან რესტორანს მაინც. გარწმუნებთ, ძალიან ისიამოვნებთ.

ჩინეთში დაბლოკილია Facebook, Instagram, YouTube, google, WhatsApp და სხვა. მათი გამოყენება VPN-ის მეშვეობით არის შესაძლებელი, თუმცა მაინც ძალიან გაწვალდებით.

ჩინელებს აქვთ აპლიკაცია WeChat, რომელიც მათთვის ფეისბუქი, იუთუბი და აბსოლუტურად ყველაფერია. ვიჩატითვე იხდიან თითქმის ყველგან და საკრედიტო ბარათებს თითქმის არ იყენებენ.

ქუჩებში უამრავი ხალხი მოძრაობს, საზოგადოებრივი ტრანსპორტი გამართულია და ფასიც ნორმალურია, არც ტაქსით გადაადგილებაა ძალიან ძვირი. მოკლედ, ჩინეთიდან შანხაის უნახავად არ უნდა წამოხვიდეთ.